⚠️ Work from home dhokha – mera asli anubhav (ye poora anubhav mera personal hai, kripya ant tak padhein aur dusron ko bhi bachayein)---Maine Instagram par 'Work From Home India' ka ek page dekha. Page par naye fake posts aur fake followers the. Maine form fill kiya aur turant call aaya. Phone par unhone bola: Din ke 5 ghante kaam, 706 ₹ software charge, fir 5000 ₹ ka plan (1 month/6 month) 7 din ki training, fix salary 40,000 ₹, kyunki meri aakhri salary 39K thi. Training ke baad 'Joining letter + Salary department' se mail aayega. Pehle mujhe 'Sikha' naam ki ladki ne call kiya. Jab baad mein main busy thi aur call back kiya toh Mayank ne uthaya aur bola: 'Main Sikha ka team leader hoon. Aapka joining main kar deta hoon.' Aur usne mujhe apne friend Yash ke niche join kar diya. Jab maine Sikha ko call kiya ki insta page fake lag raha hai, fake followers hain, negative reviews bhi hain — toh pehle toh usne trust dilaya, phir bola: 'Aap mere niche join hi nahi hue ho… Mayank aise hi sab ko apne friend ke niche daal deta hai.' Us raat 12 baje Mayank ne 2000 ₹ apne account mein le liye, bolke: 'Main team leader hoon, closing deni hoti hai.' Subah 6 baje fir 2000 ₹ aur le liya, lekin mera 6-month plan nahi kiya — sirf 1-month ka. Ye baat Sikha ne batayi. Phir Sikha ne bola: 'Aap 1500 ₹ aur do, main aapko apne niche kar dungi aur 6-month plan ho jayega. Half salary mein adjust ho jayega.' Maine de diya. Usi waqt Yash ne call karke fir pressure dala: 'Baaki payment bhi karo abhi… warna join nahi hoga.' Maine mana kar diya. Phir training shuru hui aur tab pata chala ki: ➡️ Training = 63 hours 7 din mein complete karna hota hai. Aur tab tak aapki 'incoming lead' start nahi hoti jab tak aap ek closing 706 ₹ ka nahi karwate. Yahan asli dhokha shuru hota hai: 1. Purane 900 din ke leads dete hain jinke paas pehle hi 10 HR jaake baat kar chuke hote hain. Aap unse 5 ghante mein baat karke bhi working hour complete nahi kar paate. Maine subah 8 se raat 10 tak baat ki tab bhi 4 hour 58 min hi complete hua. 2nd scam: Agar 7 din mein complete nahi hua toh bolte hain: 'Aap jitne din chahe utne mein complete karo. Paisa to gaya hi hai, ab training complete karo.' 2–3 ghante daily ka plan banaya tha. Lekin bas 2 din login nahi kiya toh ID inactivate ho gayi. Sirf 3 din purani ID ko 'inactive' kar dena = clearly scam. Fir bolte hain: ➡️ 3rd scam: 1700 ₹ aur do ID activate karne ke liye. Yahan samajh aa gaya ki: Thodi detail batate hain, thoda paisa lete hain, fir detail, fir paisa aur aise step-by-step trap karte hain. Training mein ek mahina bina salary ke aapka pura time nikal jaata hai. Salary ka koi guarantee nahi. Training mein 15–16 din ragad denge, fir bolenge: 'Closing kam hui', 'Working hours kam', 'Plan renew karo', 'Incoming start nahi hui', 'Salary hold hai'. Log end mein 10–15–20 hazaar daal dete hain aur fir chhod dete hain. Incoming start karne ke liye same customer ko 3–4 HR call karke payment nikalwa lete hain. Sabka 'incentive point' ban jata hai. Fix salary sirf bol bachan. Reality: Ye pure tarike se network marketing + fake HR model hai. Company mein 10–20–50 HR kisi asli company mein kabhi nahi hote. Ye sab log monthly 'plan' bech rahe hote hain. Aap jis HR se join hote ho — training shuru hote hi aapse baat nahi karta. Bolte hain: 'HR HR se baat nahi karta.' Ye bhi unka ek scripted rule hai. ---⚠️ Final Realization: Ye sab trap hai, bas aapke paiso ka business. Non-refundable payments. Purane leads. Pressure calls. Fake team leaders. Fake promises. Company profit mein hi profit mein — logon ko loot kar. ---✨ Mera personal feeling: Mujhe apne 6,000 ₹ ke waste hone ka dukh nahi. Mere paas skill aur experience hai, main recover kar lungi. Dukh is baat ka hai ki: Chote students, part-time kaam karne wale boys, housewives, gareeb log — in sab ko ye log phasate hain. Unka paisa, time, aur confidence barbaad karte hain. Bahut log samajh gaye aur mana kar diya — unki maturity dekh kar achha laga. ---✨ Last Message: Apna paisa skills pe lagao, in traps mein mat padho. Agar yaha tak padhe ho — please apne doston ko bhi warn karo. Trapping se safe raho.
Claim your business profile now and gain access to all features and respond to customer reviews.
Discover the opportunities with WFHI Software: Work from anywhere, anytime, on any device 🔎✨💻📱
